کوئی نہ سایہ شبِ وصل روشنی سے ملا
وہ ماہ رُخ کہ ہمیں اتنی بے رُخی سے ملا
ہم ایسے اِس کے اشاروں پہ ناچتے تھے کبھی
ابھی جو شخص ہمیں اتنی بے بسی سے ملا
کسی کرن نے مرا راستہ اُجال دیا
کوئی ستارہ مری شامِ سُرمئی سے ملا
وگرنہ ہم تو کبھی آپ سے نہ مل پاتے
ہمیں کہ اپنا پتہ اپنی بےخودی سے ملا
کبھی وہ مجھ سے ملے گا تو یوں لگے گا اُسے
کہ اجنبی سا کوئی شخص اجنبی سے ملا
کلام کرنے لگا پھر کوئی لبِ خاموش
کہا جو اُس نے مجھے اُس کی اَن کہی سے ملا
مجھے تو ایسا لگا تھا حیات ختم ہُوئی
یہ سلسلہ تو کسی اور زندگی سے ملا
میں اپنے کاندھے پہ بادل اُٹھا کے لایا تو
بلا کا دشت مجھے کتنی عاجزی سے ملا
پکارتا تھا جسے میں گلی گلی میں جمیلؔ
نواحِ جاں میں مجھے آ کے خامشی سے ملا
0 comments: