Suna Hai Rai'Gaani Ki Kahaani Likh Rahe Ho Tum..?
Kahan Se Lafz Laao Gay..??
Ibaarat Kya Banaao Gay..
Jo Lehje Main Hai Dukh Ka Zaaiqa
Usse Kaise Chupaao Gay...
Agar Tehreer Likho Gay
Muhabbat Ki Gavaahi Se
Judai Ki Siyaahi Se
Qalam Ki Aankh Roye Gi
Sab Hi Asloob
Saare Istiyaare Rooth Jain Gay
Jo Dil Per Bandh Hain Baandhen
Woh Saare Toot Jain Gay
Kisi Likh Ker Mitaii Satr Per
Jab Dehaan Tehre Ga
To Ek Be Naam Sa Rishta
Zeest Ka Unwaan Tehre Ga
Usse Jhutlao Gay Kaise?
Bayaan Kar Paao Gay Kaise?
Aziyyat Ke Haawalon Ko
Muhabbat Ki Misaalon Ko
Kisi Kirdaar Ke Dil Per Pare
Zakhmon Ko,Chaalon Ko
Bikharte Khuwaab Likho Gay
Ruke Selaab Likho Gay
Kahaani Main Jahan Per Hijar Ka Tum Baab Likho Gay
Kaho Hai Taab?
Likho Gay?
Kahaani Main Amooman aakhri Safhe Pe Aaker Hi
Dilon Ke Chaak Silte Hain
Yeh Wirsey Dukh Ke Milte Hain
Magar Tum Khol Bethe Ho Yeh Safha Shaam Se Pehle
Maqaam e Sabar Se Pehle
Hadd e Ilzaam Se Pehle
Kahaani Khatam Hi Karni Hai Agar
Anjaam Se Pehle
To Yeh Bhi Faisla Kar Do
Ke Hum Likhen To Kya Likhen?
Tumhaare Naam Se Pehle...!!
0 comments: